Та тоглож байсан

Манай Ирмүүний хэл ам нь гүйцэгдэхгүй ээ, ер нь их заргач. Логиктой, логикгүй үзэж гарна. Аав нь Ирмүүнийг тоглоомоо хураа, одоо унт гэв.

- Би тогломоор байна ш д.

- Одоо орой болчихсон байна, унт.

- Та ч гэсэн (орой болчихсон байхад) тоглодог л биз дээ.

- Хэзээ би тоглож байсийн... 

- Худлаа ярь. Би ээжийн гэдсэнд байхдаа гэдсийг нь цоолоод харсан чинь та тоглож байсан. 

Өргөст хэмхийн түүх

Цэлмүүн нэг, хоёр настай байхдаа гарт тааралдсан юмаа тэврээд л, бүүвэйлээд явдаг байсан юм. Нэг өдөр уртаа гэгчийн өргөст хэмх алчууранд ороогоод тэвэрчихсэн, бүүвэй бүүвэй гэчихсэн явж байв. Тэгэж яваад өргөст хэмхээ нэг газар тавьчихсан байсныг нэг нь олоод хугалаад нэг хазчихжээ. Цэлмүүн мэдчихээд "Миний хүүхдийн толгойг идсэн байна" гээд, өнөөх нь "Танай хүүхэд байсныг мэдсэнгүй" хэмээн бөөн л уйлаан майлаан болов.
Тэгэж байгаад нэг хартал Цэлмүүн өнөөх хоёр хугархайгаа хоёр талдаа тэвэрчихсэн, ихэр хүүхэдтэй гэчихсэн явж байв.

Одноос ирсэн ...

Бид хэд хүүхэлдэйн театрт "Одноос ирсэн ханхүү" жүжиг үзэв. Эхлэх цагаа хүлээнгээ тэр хавиар байгаа жүжгийн зурагт хуудсууд дээр юу бичсэнийг надаар уншуулж байв.  Одноос ирсэн ханхүү, доголон шаазгай, долоон одой гэхчлэн...
Орой нь гэртээ ирээд Ирмүүнээс ямар жүжиг үзлээ гэж асуутал "Одноос ирсэн доголон шаазгай" гэдэг юм даа.

Цусны бүлэг

Цэлмүүн:
- Ээж ээ, би хэддүгээр бүлгийн цустай вэ? гэж асуулаа.
- Мэдэхгүй байна, ээжийнхээ, эсвэл аавынхаа аль нэгний цусны бүлгийг авсан байгаа. Цусны шинжилгээ өгч байж мэдэх боломжтой гэж тайлбарлалаа.

Тэгтэл нэг өдөр Цэлмүүний хамраас цус гоожиж, бид хоёр хүйтэн усаар угаах зуур:
- Ээж ээ, миний хамраас цус гоожсоор байгаад тантай адилхан бүлгийн цустай болчихвол яах уу?
- Юу гэсэн үг вэ? Ойлгосонгүй!
- Мэдэхгүй, би ч гэсэн ойлгохгүй байна гэв.

Аавын хүүгийн юу хурц вэ?

Багш нь Ирмүүний ангид шинэ зүйр цэцэн үг заажээ.
- Адуун сүргийн туурай хурц, аавын хүүгийн гэтэл Ирмүүн:
- Хумс хурц гэж яаран хэлэв гэнэ.

Уул нь "Адуун сүргийн туурай хурц, аавын хүүгийн ухаан хурц" гэдэг Монгол ардын зүйр цэцэн үг байжээ.

Долоо үсрээд...

Цэлмүүн: Манайх хэзээ нүүх юм бэ?
Ээж: Үсрээд л долоо хоноод нүүнэ.

**********************

Цэлмүүн: Ээж, манайх долоо үсрээд нүүнэ тээ.

Хүргэн

Үдшийн үлгэрээр Хаан ба 9 хүргэн гээд үлгэр уншиж байв. Тэгтэл Ирмүүн:
- Хүргэн гэж хэн юм бэ? гэв.
- Охинтой нь суусан хүнийг хүргэн гэдэг, аав нь жижиг эмээгийн хүргэн гэхчлэн чадлаараа л тайлбарлав. Тэгтэл Цэлмүүн:
- Аан, тэгвэл Чээгий агаа бас хүргэн юм байна тийм үү?
- Тийм гэтэл Ирмүүн:
- Миний хүргэн хэн юм бэ? гэж гэнэт дундуур орж ирэв.
- Миний хүү том болоод охинтой болохоороо хүргэнтэй болно.
- Аааааааааан, надад хүргэн байхгүй юм уу? Би хүргэнгүй яах юм бэ? гэж Ирмүүн гоншгонолоо.

"Тийм юм сонирхдоггүй"

Зурагтаар хоёр хүн үнсэлцэж гарав. Цэлмүүн нүдээ буруулан:
- Би эрэгтэй, эмэгтэй хүн үнсэлцэж байгааг харж чаддаггүй шд, ичээд байдаг юм аа гэж надад ярив.
- Яагаад гэж би сонирхтол
- Би угаасаа тийм юм сонирхдоггүй юм аа гэв.

Том машин

Ирмүүн цэцэрлэгтээ өдөр бүр машин ч юм уу, супер баатар ч юм уу нэг тоглоом бариад явна. Алга болгоно гэж бараг байхгүй, яг бариад л хүрээд ирнэ. Уул нь багш нь тоглоом авчирч болохгүй гэдэг ч өөрийн тоглоомтойгоо очих нь нэр хүндийн асуудал юм шиг байгаа юм, авч явна гэж зүтгээд нэмэргүй.
Нэг орой цэцэрлэгээс ирээд Ирмүүн гомдоллов.
- Ээж ээ, Сүлдээ миний машиныг кармаандаа хийчихээд өгөхгүй байсан.
- Тэгвэл дахиж машин авч яваад дэмий юм байна, миний хүү битгий авч яваарай.
Байдал эвгүйгээр эргэж, тоглоом авч явах эрхгүй ч болох магадлал байгааг Ирмүүн мэдэрч:
- Карманд нь багтахгүй том машин л аваад явчихъя гэж зальтай хэллээ.

Төрсөн өдрөөрөө (Саарал цамцтай нь Сүлдээ.)

Бурхан

Улаан бурхан гадуур их дэгдэлттэй байна, амралтын өдрөөр гадуур явахгүй гэж би хэллээ. Цэлмүүн:
- Улаан бурхан гэж юу юм бэ? Улаан өнгөтэй бурхан юм уу? Аватар дээр гардаг галын бурхан уу?

Манай Цэлмүүн АХА тэмцээнд түрүүлсэн шд, аль өвөл...
***********************
Зайсангийн шар бурхны хажуугаар өнгөрөх тоолондоо манай хоёр танимхайран сүйд болдог юм. Бурхан багш, бурхан багш гээд л. Тэгтэл нэг өдөр Ирмүүн
- Ээж ээ, бурхан багш юу заадаг юм бэ? гэлээ. Нээрээ л бурхан багш юу заадаг билээ гэж бодогдлоо.

Нуугдаж тоглосон нь

- Ирмүүн, таавчикаа өмс.
...Хэсэг хугацааны дараа
- Ирмүүн, таавчикаа өмсөхгүй яасан юм бэ?
- Хайгаад олдохгүй байнаа. Яасан сайн нуугддаг гутал вэ, тээ?!

Найс кино цэг ком

Манай гэрийнхэн том жижиггүй кино их үздэг. Кино театрт ирсэн бүх киног, за тэгээд сайтуудаар байгаа киноноос сонгож байгаад үзнэ. Тэгтэл Цэлмүүн нэг өдөр зүв зүгээр хоолны ширээнд сууж байснаа "Найс кино цэг ком" гэнээ, цээжилтлээ үзэж дээ.

Хана амьд уу?

Ирмүүний цэцэрлэгт амьтай, амьгүй зүйлсийн талаар заасан бололтой. Манай хүн харсан юм болгоноо амьд уу, үгүй юу гэж асуудаг болсон.

Ирмүүн хана арчиж байв. 

- Одоо намайг (хар толбыг) арилгачихлаа гээд хар юм гомдох уу?

- Үгүй ээ, хана харин ч баярлана.

- Хана амьд юм уу?

- Үгүй, амьд биш.

- Тэгээд яаж баярлах юм бэ?

- Үгүй яахав дээ, дээр нь байсан хар юмийг арилгачихаар баярлах байлгүй гэсхийгээд өнгөрөв. Дараа нь Ирмүүн хананы амь нь дотроо байдаг гэсэн тууж явав. 

- Машин амьтай юу?

- Амьгүй.

- Тэгээд яаж явдаг юм бэ?

- Хммммм....

Таван эхнэр

Ирмүүн таван эхнэртэй болно гэнээ...

Бяцхан төгөлдөр хуурч Цэлмүүн

Цэлмүүн Хараацай хүүхдийн урлагийн наадамд ангийнхаа хүүхдүүдтэй хөгжим, бас дууны хамтлагаар оролцож, хөгжмөөрөө мөнгөн медаль авлаа.
2 нь төгөлдөр хуур тоглоод бусад нь янз бүрийн шажигнадаг юм дуугаргаад сүрхий л юм болсон бололтой.

Цэлмүүний багын явдлаас #2

Цэлмүүн үзэг бал харангуутаа хаана ч хамаагүй эрээчээд зураад унана. Анх эгч нь алган дээр нь цэцэг зураад үзүүлчихснээс хойш гаран дээр л зурдаг, бүр болохгүй бол өөр юман дээр зурдаг гээд ойлгочихсон. Бүр эмээгийнхээ цамцыг сөхөөд гэдсэн дээр нь зурах гэж оролдсон гэсэн.

Эмээ нь хардаг болсноос хойш эмээгээ юу хийнэ бүгдийг дуурайдаг болсон. Эмээ нь ялаа алсан чинь ялаа алъя гээд цонх руу асдаг зуршилтай болжээ.
Эмээ нь гадагшаа гарах гээд охины хувцсыг өмсүүлчихээд өөрөө хувцсаа өмсөөд ирсэн чинь охин үүдэнд нэг тоглоом, гэрийн түлхүүр барьчихсан зогсож байна гэнэ. 1 нас 4 сартай хүүхэд шүү дээ.

Цэлмүүний багын явдлаас

Суваг солигдоод байхаар нь гайхан хартал охин хөлийнхөө хуруугаа зурагтын суваг сольж суув.

Эмээгийнхээ газарт дэлгэсэн даавуун дээр гүйж байгаад баачихжээ.

Миний охин тагтааг над дээр ирээч гээд гараа тосоод гуйдаг.

Хүүхдүүдтэй дандаа "сайн байна уу" гээд гараа сунгаад мэндэлдэг, баяртай гэж салах ёс хийдэг.

Дэлгүүрт ороод лангууны ардуур гүйж ороод барааг нь буулгаж зөөгөөд их үймүүлдэг  сурагтай.

Миний буруу биш юм уу?

Ирмүүн гонгинодог насан дээрээ байгаан.

Цэлмүүнийг миний охин яасан хөөрхөн юм бэ? ямар мундаг юм бэ? гээд магтахаар Ирмүүн би мундаг биш юм уу? Би хөөрхөн биш юм уу ? гээд гонгиноно. Сав л хийвэл гонгиноно.

Тэгсэн чинь саяхан юуны ч тухай ярилцаж байлаа даа, энэ яг тэрний буруу гээд аав бид хоёр ярилцаж байтал Ирмүүн “Тэгээд миний буруу биш юм уу?” гэж гонгинов.

Нэг л гомдсон, барьцсан хүн энд нэг ширхэг байна. 

Шулга болохоор ...

Ирмүүний нүүр ойрдоо холцруутах маягтай. Унтахдаа тос түрхээд унтавч өдөрт тийм олон нүүрээ угаадаг юм байлгүй, хуурай, холцруутсан хэвээр.
Ирмүүний нүүрэнд тос түрхээд хүүгээ энхрийлж үнсээд:
- Яагаад миний хүүгийн нүүр холцруутаад байгаа юм болоо гэтэл Ирмүүн өөдөөс:
- Яагаад гэвэл би шулга юм чинь гэдэг байгаа.
- Хахаха. Шулга бол нүүр нь холцруутдаг юм уу гээд шоолсон чинь
- Тэгдийн за юу, угаасаа тэгдийн гэнээ.

Үймүүлсэн үү?

Цэцэрлэгээс харьж явав. Ирмүүн:

- Ээж, та өнөөдөр ажил дээрээ үймүүлсэн үү?

- Үймүүлээгүй.

- Үймүүлэхгүй яасийн?

- Би яаж үймүүлэх ийн? Ээж нь ажил дээрээ үймүүлдэггүй шд.

- Унт гэхээр нь унтахгүй, худлаа нүдээ аниад л үймүүлэхгүй яасийн...

Ажил дээр намайг унт гээд л, тэгэхээр нь би унтахгүй худлаа нүдээ анивал үнэхээр хөгжилтэй байх гэж бодогдлоо. Хааяа ч унтчихмаар, дуусдаггүй урт ажлын өдрүүд байдаг шүү.

Пуужин

Бид бас л гадуур машинтай явж байв. Орой болж харанхуй болжээ. Цэлмүүн бүх үсэг мэднэ, муухан холбоод зарим нэг үг үсэг уншдаг ухаантай. Машинд уйдаад оньсого, үсэг таалцахаар болж:
- Одоо юу болж байгаа билээ? Ш-Ө ... гээд асуутал Цэлмүүн:
- Шөнө гэж зөв хариулав.
- Сайн байна. Тэгвэл Н-А-Р?
- Нар!
- Мундаг шүү. М-А-Л?
- Пуужин!!!

Хаанаас юун пуужин гараад ирсэн юм, бүү мэд!

Лийр жил

Цагаан сар дөхөөд жилийн тухай яриа болов. Цэлмүүн:
- Би хулгана жилтэй, чи туулай жилтэй гэхэд Ирмүүн:
- Үгүй ээ, аниа та лийр жилтэй шд. Та лийрэн дээр суудаг биз дээ...

Манай нэг найз ...

Манай Ирмүүн их олон найзтай юм билээ.
Скай резорт руу явах замд Ирмүүн:
- Хурдал, хурдан давхи гээд байв.
- Өвөл халтиргаатай зам дээр хурдан давхих аюултай, машинууд хоорондоо мөргөлдөөд осол гардаг. Санаж байна уу, кинон дээр нэг айл гэрээрээ явж байгаад осолд ороод бүгдээрээ нас барсан гээд л ярилаа. Тэгтэл Ирмүүн:
-  Манай нэг найз бас хурдан давхиж байгаад, осолд ороод, тэгээд үхчихсэн шд гэв.

Буцах замд Туул голын эргээр цасан дээр тоглож байсан хүүхдүүдээс нэг халтираад уначихав. Тэгтэл Ирмүүн:
- Манай нэг найз тоглож байгаад, халтираад, унаад бөгс нь ёоёо болчихсон шд гээд ярилаа.

Гэрт Ирмүүн угаалгын машин дээрээс үсрээд хөлөө өвтгөчихөв.
- Осолтой шдээ, яагаад эндээс үсэрч байгаа юм бэ? гэхээр өөдөөс
- Манай нэг найз өндрөөс үсрээд үхчихсэн шдээ гэв.

Иймэрхүү түүх зөндөөг ярилаа. Ирмүүн их олон ч найзтай юм, бас нилээд хэд нь үхчихсэн юм... o_0

Цэцэг

 Цэлмүүний өглөөний хоолоор хийсэн цэцэг

Ирмүүн ч бас эгчийгээ дуурайв.

Хөгжилтэй ярианаас

Машинтай хотоор явж байгаад машины антенны талаар яриа болов. Энэ юу вэ? Үүгээр яадаг юм бэ? Яг яаж ажилладаг вэ? Яагаад заримынх нь ийм урт байна вэ? Энэ антенн байна, тэр бас антенна байна гэхчлэн ярилцлаа.

Тэгтэл нэг өдөр Цэлмүүн машинд явж байснаа:

·         Ээж, ээж, энийг хар даа? Аймаар том антеннтай автобус явж байна! Гэхээр хартал:

-------------------------------------------------------------------------
-------------------------------------------------------------------------

Аав нь Ирмүүнийг юман дээр гараад зогсчихож гэж бодоод:
А: Наад дээрээсээ буу гэв.
И: Би юман дээр зогсоогүй ээ, хөлнийхөө хамар дээр зогсож байнаа гэхэд хартал өлмий дээрээ зогсож байлаа.

Явдаг сар

Цэцэрлэгтээ явахаар өглөө эрт гартал нар хараахан мандаагүй, тэнгэрт хавирган сар гялтайн харагдана. Хэсэг явсны эцэст Ирмүүн:
- Энэ сар бид нарыг дагаад байна. Явдаг юм байх даа? Дугуйтай юм болов уу? Далавчтай юм болов уу? гэв.

Ирмүүн 2 настай.

Хумсны баавгай

Зурагтаар бидний нэрлэж заншсанчлан панда гарч байв. Би:

-          Панда гарч байна гэтэл

-          Үгүй ээ, хумсны баавгай гарч байна гэж Цэлмүүн мэтгэв.

-          Хумсны биш ээ, хулсны баавгай гэдэг байхгүй юу. Урт нарийхан хулс гэдэг мод ургадаг ойд амьдардаг, хулс иддэг болохоор нь хулсны баавгай гэж нэрлэсэн юм гэж би тайлбарлав.
Өнөөх чинь сүрхий ойлгосон царайтай харж байснаа

-          Бас хумсаа иддэг тээ... гэв.

Багшийнхаа хэлснийг хумсны баавгай, хумсаа иддэг баавгай гэж ойлгоод тогтоочихсон нь  ой тойндоос тийм ч амархан салахгүй байгаа бололтой.

Энэ явдлын дараагаар би багадаа ээжтэй үгүй, манай багш тэгэж хэлсэн, багшийн л зөв гэж маргадаг байснаа саналаа.

Усан Оргилуур

Ирмүүний баримлын шавраар хийсэн бүтээл.