Шилэн трико

Цэлмүүний сургууль Lion King-р музикал хийж байгаан. Арслангийн хувцас авчир гэхээр нь эмээдээ хэл гэлээ.
Ц: Эмээ, арслангийн хувцас хэрэгтэй, дээгүүрээ шилэн трико шиг бор цамц, доогуураа бор өмд хэрэгтэй.
Э: Шилэн трико шиг цамц гэж ямар цамц байдаг юм бэ? Ямар материалаар хийх вэ?
Ц: Шилэн триконы материалаар.
Э: Хэхэ, тийм материал байхгүй шд.
Ц: Тэгвэл шилэн трико залгаж байгаад хийчих ээ.

Шилэн трико авч байгаад хайчлаад залгаад цамц хийхийм байна л даа.

Өндөр жил

- Ээж, таньд цагаан үс байна шдээ. Таныг би хөгшрүүлмээргүй байна. Та 2 сарын 26-нд төрчихгүй. Тэгвэл хэдхэн жилд нас нэмэхгүй юу?!

Хүүхэд төрүүлэхгүй

- Ээж, би хүүхэд яаж төрүүлдгийг харсан шдээ. Аниа үзүүлсийн. Тэгээд аймаар өвддөг юм байна лээ. Би яаж төрнөө? Ер нь би доороосоо даараад хүүхэд төрүүлж чаддаггүй болноо. Доороосоо даарвал хүүхэд төрүүлж чаддаггүй болдог гэсэн. Манай ангийн хүүхэд тэгэж байна лээ.

Шүд соёолжийн

Ц: Ээж ээ, миний шүд соёолжийн.

Соёолоод байхдаа яахав дээ, ямар ургамал биш.. 😋

Стресс

Цэлмүүнтэй утсаар ярив.
Э: Миний охин юу хийж байна? Өнөөдөр сонин юу болов?
Ц: Ээж ээ, миний шүд өвдөөд. Унахгүй өвдөөд байнаа, би аймаар стресстэй байнаа. Одоо би яанаа? Энэнээс би ер нь амьд гарахгүй юм шиг байнаа....
--

Ээжийн охин

Ц: Дүү хурдан том болоосой.

Э: Яагаад? Дүүтэйгээ тоглох гэсийм үү?

Ц: Үгүй, ээжтэйгээ унтъя.

Манай эмээ чихэр ид ид гэдэг

Цэлмүүн чихрэнд нилээд хойно ороод хүчтэй дурлаж байсан юм. 3, 4 настай байхдаа жижиг өвөөгийндөө зочилж очив. Эмээ нь чихэр идүүлэхгүй гээд чихрийн тавгаа дээш нь тавьчихаж л дээ. Тэгтэл Цэлмүүн олж харчихаад чихэр идчих санаатай:
"Манай том эмээ намайг очихоор чихэр ид ид гээд байдгийн шд" гэсэн гэнэ. Бас том, жижиг эмээгээ өрсөлдүүлж байгаад чихэр олоод идчих заль байнаа байна.

Өндөр халуураад

Цэлмүүн: Ээж, манай ангийн хүүхэд өчигдөр халуурсан шд. Аймаар өндөр халуураад, бүр хатгаа авч хүрэхээр халуурсан. 

Би чихмэл

Ээж: Ёоо, Ирмүүн ээээ. Ноолохоо болиоч ээ. Нээх хатуу гартай шд.

И: Би тэгвэл хатуу, чулуу юм байна л даа. Аниа тэгвэл зөөлхөн даавуу юм байна.

Ц: Үгүй ээ, би даавуу биш. Би чихмэл. :D

Мухар сүсэг

Цэлмүүнтэй утсаар ярьж байв.
Ц: Ээж, би ихэнх хараалыг мэднэ шд, одоо ганцхан хараал сурчихвал хамгийн мундаг нь боллоо.
Э: Юу гэнээ?
Ц: Ээж, би зөндөө хараал сурсан.
Э: Ямар хараал?!!
Ц: Унтахдаа толинд харж болохгүй, орондоо дуулж болохгүй гээд л...
Э: Орондоо дуулж болохгүй гэдэг хараал юм уу?
Ц: Биш юм уу? Тэгээд юу юм бэ?
Э: Мухар сүсэг!
Ц: Юу гэнээ? гээд утасны цаанаас хэд хэд давтаж асуув. "Мухар сүсэг гэж юу гэсэн үг ийн?"
Э: Худлаа юманд итгэхийг хэлдэг юм аа гэж залхталаа тайлбарлах гэж оролдлоо. Эцэст нь Цэлмүүн ойлгосон бололтой:
Ц: Аан, мухар сүсэг чинь тийм юм бол орондоо дуулж болох юм байна, тээ гэнээ.
...........
Тэгтэл Ирмүүн цаанаас орж ирэв.
И: Ээж, та надтай ярихгүйгээр баяртай гэчихэж байгаа юм уу?
Э: За ярья л даа.
И: Мухар сүрдэм гэж юу гэж байгаан?

Логик

Радиогоор нэг дуу явлаа, Цэлмүүн
- Энэ Содура киноны дуу байна. (Дээр үед өвөө эмээтэйгээ цуг зурагтаар Содура үзэж байлаа.)
- Миний охин яасан сайн ойтой юм бэ?
- Би нээрээ ингэсийн шд.
- За.
- Би дээр үхрийн нүд түүх гэж байгаад халгайд хөлөө түлчихсэн байхгүй юу, тэгсэн чинь Амила миний хөлөн дээр шээсийн. Тэгсэн чинь шээс нь аягүй халуун байсан шд.
- Тэгээд?
- Тэгээд л тэр.
- o_0!!!

Санхүүгийн мэдлэг

Ирмүүн том төгөлдөр хуур нэхэв.
А: Мөнгөтэй болохоороо авч өгье.
И: Хэд хэрэгтэй байдаг юм бэ?
А: 6 сая.
И: Танд байхгүй юм уу?
А: Байхгүй.
Тэгтэл Цэлмүүн яриан дундуур орж ирэв.
Ц: Тэгвэл 7 сая байгаа юу? Аав нь тоглоод
А: Байгаа.
Ц: Тэгвэл худалдагчид нь долоон саяыг өгье гэж гуйж байгаад авчихъя л даа.

Цэлмүүн уул нь математикаа торохгүй хийгээд л байдаг юм, гэтэл санхүүгийн мэдлэг үнэн 0 байлаа.

Ямбай...

Буддаг ном будаж суулаа.
Цэлмүүн: Ээж ээ, би гоё ямбай будаж байгаа биз? (нямбай гэж хэлж байгаа нь тэр, нэг тиймэрхүү үг байна гэж тогтоосон бололтой.)
Ирмүүн: Би бас гоё ямбай будаж байгаа биз? (Цэлмүүн юу хэлнэ, хийнэ, дуурайна.)
Нинжин: Би бас гоё тийм будаж байгаа биз.... (Сайн чадахгүй ч байсан бас дуурайна.)

Амьдаар мэдээлсэн нь

Цэлмүүн том болоод хөгжилтэй юм ярих нь багасчээ. Харин нэг тийм, ухсан, яагаад гэсэн ухаалаг асуултууд их асуух болсон, бас жаахан ааштай болсон.
Цэлмүүнтэй утсаар ярихад
- Миний охин юу хийж байна?
- Надтай тоглох хүн байхгүй байна, би энд ер нь байгаад яадийн. (Хэсэг байзнаснаа) Би утсаар ярьж байна, Ирмүүн тоглож байна, өвөө зурагт үзэж байна. Өвөө зурагт яг үзээд ч байгаам уу, би мэдэхгүй байна хэмээн нэг амьсгаагаар үргэлжлүүлэн ярьж гарлаа.

Скочдсон нь

Ирмүүн Цэлмүүн хоёрыг машинд суулгаад Эрдэнэт рүү явууллаа. Цэлмүүн машинд удаан явахаар бөөлждөг талтай. Хэсэг яваад Цэлмүүн бөөлжөөд байсанд авч явж байсан ах эгч хоёр Цэлмүүний хүйсэн дээр наах санаатай скоч гаргаж ирж гэнэ. (Хүйсэн дээр скоч наахаар бөөлждөггүй гэдэг юм, би ерөөсөө итгэдэггүй юм.) Тэгтэл Ирмүүн сандран
- Яах гэж байгаа юм бэ? Яах гэж байгаа юм бэ? Амыг нь скочдох гэж байгаа юм уу? гэсэн гэнэ. Эгчийг нь бөөлжөөд байхаар амыг нь скочдох гэж байна хэмээн санаа нь зовсон бололтой.

Өргөст хэмхийн түүх

Цэлмүүн нэг, хоёр настай байхдаа гарт тааралдсан юмаа тэврээд л, бүүвэйлээд явдаг байсан юм. Нэг өдөр уртаа гэгчийн өргөст хэмх алчууранд ороогоод тэвэрчихсэн, бүүвэй бүүвэй гэчихсэн явж байв. Тэгэж яваад өргөст хэмхээ нэг газар тавьчихсан байсныг нэг нь олоод хугалаад нэг хазчихжээ. Цэлмүүн мэдчихээд "Миний хүүхдийн толгойг идсэн байна" гээд, өнөөх нь "Танай хүүхэд байсныг мэдсэнгүй" хэмээн бөөн л уйлаан майлаан болов.
Тэгэж байгаад нэг хартал Цэлмүүн өнөөх хоёр хугархайгаа хоёр талдаа тэвэрчихсэн, ихэр хүүхэдтэй гэчихсэн явж байв.

Цусны бүлэг

Цэлмүүн:
- Ээж ээ, би хэддүгээр бүлгийн цустай вэ? гэж асуулаа.
- Мэдэхгүй байна, ээжийнхээ, эсвэл аавынхаа аль нэгний цусны бүлгийг авсан байгаа. Цусны шинжилгээ өгч байж мэдэх боломжтой гэж тайлбарлалаа.

Тэгтэл нэг өдөр Цэлмүүний хамраас цус гоожиж, бид хоёр хүйтэн усаар угаах зуур:
- Ээж ээ, миний хамраас цус гоожсоор байгаад тантай адилхан бүлгийн цустай болчихвол яах уу?
- Юу гэсэн үг вэ? Ойлгосонгүй!
- Мэдэхгүй, би ч гэсэн ойлгохгүй байна гэв.

Долоо үсрээд...

Цэлмүүн: Манайх хэзээ нүүх юм бэ?
Ээж: Үсрээд л долоо хоноод нүүнэ.

**********************

Цэлмүүн: Ээж, манайх долоо үсрээд нүүнэ тээ.

"Тийм юм сонирхдоггүй"

Зурагтаар хоёр хүн үнсэлцэж гарав. Цэлмүүн нүдээ буруулан:
- Би эрэгтэй, эмэгтэй хүн үнсэлцэж байгааг харж чаддаггүй шд, ичээд байдаг юм аа гэж надад ярив.
- Яагаад гэж би сонирхтол
- Би угаасаа тийм юм сонирхдоггүй юм аа гэв.

Бурхан

Улаан бурхан гадуур их дэгдэлттэй байна, амралтын өдрөөр гадуур явахгүй гэж би хэллээ. Цэлмүүн:
- Улаан бурхан гэж юу юм бэ? Улаан өнгөтэй бурхан юм уу? Аватар дээр гардаг галын бурхан уу?

Манай Цэлмүүн АХА тэмцээнд түрүүлсэн шд, аль өвөл...
***********************
Зайсангийн шар бурхны хажуугаар өнгөрөх тоолондоо манай хоёр танимхайран сүйд болдог юм. Бурхан багш, бурхан багш гээд л. Тэгтэл нэг өдөр Ирмүүн
- Ээж ээ, бурхан багш юу заадаг юм бэ? гэлээ. Нээрээ л бурхан багш юу заадаг билээ гэж бодогдлоо.